అందరినీ చిరునవ్వుతో పలకరించండి

గుడ్ మార్నింగ్, గుడ్ నైట్, ఆల్ ది బెస్ట్… కొన్నిసార్లు మన శుభాకాంక్షలు కేవలం పదాలకే పరిమితం అవుతుంటాయి, ఎటువంటి భావాలూ ఉండవు. మనకు లోపల ఎదుటివారి సమర్థతపై పూర్తిగా నమ్మకం లేకపోయినాకానీ వారిని మనం సంపూర్ణ నమ్మకంతో గ్రీట్ చేయవచ్చు. శుభాకాంక్షలు కేవలం పదాలు కాదు, అవి గొప్ప శక్తి నిండిన ఆశీర్వచనాలు. ఎదుటి వ్యక్తికి ఖచ్చితంగా మంచి జరగాలని సంపూర్ణంగా కాంక్షించి చెప్పేవే శుభాకాంక్షలు. అయితే, కొన్నిసార్లు మనం వాటిని కేవలం పదాలకే పరిమితం చేస్తుంటాము, అందులో ఎటువంటి భావాలను జత చేయము.

1. కుటుంబ సభ్యులు, పొరుగువారు, క్రొత్తవారు, తోటి ప్రయాణికులు, సహపాఠకులు – ఎవరైనా కానీ, రోజులో మొదటిసారి కలుస్తున్నప్పుడు ఎంతో ఉత్సాహంగా వారిని గ్రీట్ చేయండి. పవిత్రమైన శక్తిని సృష్టించి ఇతరులకు అందించడానికి ఇది ఒక మంచి అవకాశం.
2. నిజాయితీగా వ్యక్తులను గ్రీట్ చేయడానికి, చిరునవ్వుతో పలకరించడానికి కేవలం 3 సెకండ్ల సమయం సరిపోతుంది. వారి రోజు మంచిగా జరగాలి అన్న భావనను, నమ్మకాన్ని లోపల కలిగి ఉండండి. ఇది వ్యక్తులు మరియు వాతావరణ శక్తిని పెంచుతుంది. మీరు చేసే ఈ మంచి ఆలోచనల పరిణామాన్ని పొందేది ముందుగా మీరే.
3. స్వచ్ఛందంగా అందరినీ పలకరించండి. వారు మీకన్నా చిన్నవారని, పదవిలో మీకన్నా జూనియర్ అని, అహం అడ్డుకున్నదని గ్రీట్ చేయడం మానకండి. అందరికీ, అన్ని వేళలా మంచితనాన్ని పంచండి.
4. మీరు పలకరించినప్పుడు ఎవరైనా సరైన విధంగా బదులివ్వకపోతే మీరు మాత్రం మీ అందమైన సుగుణాన్ని విడిచిపెట్టకండి. ప్రక్కరోజు కూడా వారికి గ్రీటింగ్స్ తెలపండి… ఆ తర్వాత రోజు కూడా… ఆ శక్తి మిమ్మల్ని, వారిని ఎలా మారుస్తుందో గమనించండి.