భగవంతుని ప్రేమ మరియు సహాయంతో సానుకూలతను అనుభవం చేసుకోవటం  (పార్ట్ 3)

ప్రతికూల పరిస్థితులను అధిగమించడంలో భగవంతుడు మనకు ఎలా సహాయం చేస్తారు?

కొందరు భగవంతుడు నాకు ఈ సమస్యలను ఎందుకు ఇచ్చాడు? వారు కేవలం ఒక ప్రేక్షకుడిలా మాత్రమే ఉండి, దాన్ని పరిష్కరించడానికి నాకు ఎందుకు సహాయం చేయడం లేదు? అని అడుగుతారు.  భగవంతుడు మన పరమ పిత మరియు మనం వారి పిల్లలం. వారి సహాయం తీసుకోవడం మన హక్కు. కాని వారి సహాయం కేవలం ఒక ఆలోచన దూరంలో ఉన్నప్పటికీ మనం  మొదట కుటుంబంతో, స్నేహితులతో చర్చిస్తూ భగవంతుడు మన పిలుపు కోసం వేచి ఉన్నారని మర్చిపోతాము. మనలో కొందరు భగవంతుడు తనంతట తానే మనకు సహాయం చేస్తాడని ఆశిస్తారు, కానీ అలా కాదు. ఒక పిల్లవాడు తన తల్లిదండ్రులు చూస్తున్నప్పుడు జిగ్సా పజిల్ ని పరిష్కరించే ఉదాహరణను పరిగణించండి. పిల్లవాడు ఏదో ఒక సమయంలో చిక్కుకున్నప్పటికీ తెలివైన తల్లిదండ్రులు జోక్యం చేసుకోరు. పిల్లవాడు మరింత కష్టపడి దృష్టి పెట్టాలని, ఆలోచించాలని, ఎంపికలను అంచనా వేయాలని… తన వంతు కృషి చేయాలని తల్లిదండ్రులు ఆశిస్తారు.  ఒకవేళ పిల్లవాడు పజిల్ ని విడిచిపెడితే అది చూసిన తల్లిదండ్రులు  ఒక సూచన మాత్రమే ఇస్తారు, వాళ్లు బిడ్డకు తదుపరి అడుగు మాత్రమే చెబుతారు, మొత్తం పరిష్కారం చెప్పరు. కాని పిల్లలకి మిగిలిన పజిల్ ని పరిష్కరించడానికి తల్లిదండ్రుల ప్రేమ మరియు జ్ఞానం సరిపోతాయి. సరిగ్గా ఈ విధంగానే భగవంతుడు మనకు సహాయం చేస్తారు. 

మనం సానుకూలత లేదా ధైర్యంతో ఒక అడుగు వేసినప్పుడు, భగవంతుడు మన వైపు వెయ్యి అడుగులు వేస్తారని చెబుతారు. వారు సహాయం చేయడానికి ఆసక్తిగా ఉంటారు, కానీ మనం నిజాయితీగా ప్రయత్నించిన తర్వాత మాత్రమే. అంతేకాని భగవంతుడు  స్వయంగా మన పరిస్థితిని మార్చరు. వారు మనకు జ్ఞానం, ప్రేమ మరియు శక్తి రూపంలో సూచనలు ఇస్తారు. మనం వాటిని ఉపయోగించుకొని సవాలును అధిగమించాలి. భగవంతునితో వ్యక్తిగత సంబంధాన్ని ఏర్పరచుకోవడం చాలా ముఖ్యం. మనం నిరంతరం వారితో ప్రేమగా జోడించి ఉంటే, మనం నిరంతరం సానుకూలత, వివేకం మరియు ప్రతి సన్నివేశాన్ని నిర్భయంగా, విజయంతో దాటగల శక్తితో నిండి ఉంటాము.