నా ఆత్మ జాగృతి అనే దీపాన్ని వెలిగించడము (పార్ట్ 1)

దీపావళి – ఆత్మ జాగృతి అనే దీపాన్ని వెలిగించడము

ఒక దీపంలో అద్వితీయమైన అందం ఇమిడి ఉంటుంది. దీపావళి అనేది చెడు లేదా చీకటిపై సాధించిన విజయానికి సంకేతం మరియు రానున్న నూతన సంవత్సరానికి ఉత్సవం. అయితే మనం తొలగించాలనుకుంటున్న చీకటి ఏమిటి?

మనం దీపావళిని కేవలం ఒక్కరోజు జరుపుకోవడం కాదు, మొత్తం జీవితాన్నే దీపావళి అనుభూతిగా మార్చుకుందాం.

మనం మన ఇళ్ళను శుభ్రం చేసుకుంటాం, అలాగే మన మనసులో ఉన్న అన్ని భావోద్వేగ అడ్డంకులను అంటే ఎమోషనల్ బ్లాకులను  కూడా శుభ్రం చేసుకుందాం. మనసులోని ప్రతి మూలన బాగా పరిశీలించి, పరుష పదాలు, చేదు జ్ఞాపకాలు, మోసం, గత బాధల గాయాల మరకలను మనసు నుండి తీసివేద్దాం.

క్రొత్త బట్టలు ధరిస్తాము, అలాగే మనసులో ఉన్న పాత, అనవసరమైన, కలవరపరిచే అలవాట్లు అంటే కోపం, ఈర్ష్య, చింత వంటివాటిని తీసివేసి క్రొత్తవైన, మన నిజ గుణాలైన శాంతి, ప్రేమ మరియు ఆనందాలను తీసుకువద్దాం. నూతన ఆలోచనా విధానాన్ని, పరిస్థితులకు స్పందించే క్రొత్త విధిని, నూతన జీవన శైలిని తీసుకువద్దాం.

పాత లెక్కల పుస్తకాలను సమాప్తం చేసి క్రొత్త పుస్తకాలను మొదలు పెడతాము, అలాగే మన పాత కర్మల లెక్కలను, సంబంధాలలో ఉన్న చికాకులను సమాప్తం చేసి మన సంబంధాలకు ఒక క్రొత్త ప్రారంభాన్ని ఇద్దాం. ఇలాంటి పాతవేవైనా ఇంకా పట్టుకుని కూర్చుంటే వాటిని విడిచి పెట్టేద్దాం. తప్పు చేసిన వారిని క్షమించండి, సమస్యలను పరిష్కరించుకోండి. ఇది పరిష్కారం చేసుకునే సమయం.

(రేపు కొనసాగుతుంది)